معاشی ترقی ٹیکس اصلاحات کے بغیر ممکن نہیں: چیئرپرسن پاکستان بزنس کونسل

پاکستان بزنس کونسل کی چیئرپرسن ڈاکٹر زیلف منیر نے کہا ہے کہ معاشی ترقی ٹیکس اصلاحات کے بغیر ممکن نہیں۔

انہوں نے اسلام آباد میں منعقدہ ڈائیلاگ آن دی اکانومی 2025 کی اختتامی تقریب سے خطاب میں کہا کہ پاکستان کا معاشی مستقبل استحکام، اصلاحات اور ذمہ دارانہ شراکت پر منحصر ہے۔ 

ڈاکٹر زیلف منیر کا کہنا تھا کہ کوئی بھی ادارہ اکیلا ترقی نہیں لاسکتا ، ملک کے لیے معیشت کی دستاویزی شکل بہت ضروری ہے، دو روزہ ڈائیلاگ میں پاکستان کے سرمایہ کاری ماحول، توانائی اور معدنیات کے شعبوں میں اصلاحات، نجکاری، ادارہ جاتی بہتری اور ٹیکس انتظامیہ کی جدید سازی پر گفتگو ہوئی۔

 پاکستان بزنس کونسل نے نجی شعبے کے ساتھ تعمیری شراکت جاری رکھنے کا عزم دُہرایا۔

واضح رہے کہ  تقریب میں گورنر اسٹیٹ بینک جمیل احمد، وفاقی وزیر خزانہ سینیٹر محمد اورنگ زیب، دیگر وفاقی وزرا اور نیشنل کوآرڈي نیٹر ایس آئی ایف سی لیفٹیننٹ جنرل سرفراز احمد نے بھی شرکت کی ۔